الاعتذار يا مخلوع عمره ما بيلغي حد
الاعتذار ممكن علي قلم علي الخد
الاعتذار ممــــكن لسو ء تفاهم يترد
ممكن يكون علي خطأ في العــــــــد
أو خطأ فــات يصححه شيء مستجد
تعتذر من غير ما ترد للشعب الحقوق
هو اعتذارك ممكن يخلي عيان يروق
ولا اعتذارك يخلي شهيد يرجع يفوق
ولا اعتذارك يرجع مال منهوب مسروق
ولا اعتذارك يطفي نار قلب ام محروق
اعتذر ماشي لكن لازم مـــن القصاص
قتل الشباب وأو امرك بضرب الرصــا ص
علي بيع البلد والفساد وعدم الاخلاص
علي كل شارب في دم غلبان ومصاص
كل مظلوم وليـــك في ظلمه اختصاص
اعتذر اعتذارك مش حيغير عواطفي
اعتذارك مش حيجدد شيء أو يضفي
أكـــيد كله كلام متكرر متفصل ومرفي
كـــــلام معسول والسم جو اه مخفي
خطابك اللي فات علي خداعك يكفي
اعتذارك لا يمكن حــيرجع اللـــي راح
محدش يقدر يقبله أ ويعطيك السماح
علشان ترتاح لازم كـل يتيم يـــــرتاح
ما يعرفش ليه مـــات أبــوه بالسلا ح
كان ماسك علم مصر وعامله وشاح
مش انت الراعي وكـــلنا كنا الرعـــيه
ليه كنت عامل مــصر ليك اقطاعيـــــه
ليه حرمتنا من كل حقوقنا الشرعيه
ليه حكمت فينا ولاد الشوارعيــــــــــه
ليه خصصت البلد من غير اي توعيه
عاوز تعتذر اعتذر بس الأول الطهاره
رد المظالم للتوبة شـــــــرط وكفاره
اعتذارك من غير تكفير مش شطاره
ايه الفايدة بعد اعتذارك الف خساره
لو ما كانش لاعتذارك علامة واشاره
الثلاثاء 17 مايو - 23:30:30
