هناالقاهرة والبيوت دمروها
وقتلوا الولاد والنساء والشيوخ
هنا القاهره والحقول دمروها
ودكوا الشجر بالدانات والصاروخ
هنا القاهره والبيوت مش متينه
والحيطان اللعينه مليانه بالوف الشروخ
هنا القاهره والوشوش الحزينه
بدت فى المدينه وعليها المذله ووشم الرضوخ
هنا القاهره وانت مش من بلاد العجم
ولا انت المهادن ولا انت الصنم
وجيت رغم انفك بلاد العجب
ومرغم تشاهد فصول المهانه
وترضى الاهانه
وتشرب بطوعك كؤوس الغضب
وتحزن على الدم فوق التراب
وتلقى الخراب
اللى فاتح ببانه مطلع لسانه
وعازم جيرانه
وفارش على الارض رمل العزاب
وفاتح فى قلبك ببان للالم
وتلقى الغراب اللى ناح فى البلاد
وفرق كؤوس الضنى ع العباد
وشايل جناح الرايات الجداد
بيلعن بدايه سنين الحداد
هنا القاهره
وانت مستنى تلقى سلام م اليهود
تجار الحروب
اللى خانوا مع الخلق كل العهود
وجاروا عليك وتفرك ايديك
الدموع اللى واقفه فى عنيك
ومش راضيه تنزل
لتغسل حدود البلاد اللى هانت عليك
هنا القاهره
وانت لازم تسلم وترفع ايديك
ما راحت عليك
وجفت من الدمع ميه عنيك
وهانت عليك
البلاد اللى كانت عزيزه عليك
وناحت عليك
طيور البرارى اللى كانت بتتباهى بيك
اخيرا.. عزائى واسفى اليك
يا ميت بطوعك وكل الخلايق بتضحك عليك
هنا القاهره
هذه مقتطفات من قصيده هنا القاهره للشاعر السعيد قنديل
وهو شاعر عاميهمن مواليد محافظة كفر الشيخ - مصر
صدر له عدة دواوين من اهمها
النهر الوطن- هنا القاهره - من حواديت المسافر
وقد شارك الشاعر الكبير الابنودى فى الامسيه السنويه لمعرض الكتاب فى القاهره عامى 2006 -2007
الجمعة 29 أكتوبر - 8:49:05
