أربع قصائد من أعمال بيرم التونسي

أربع قصائد من أعمال بيرم التونسي


الأوله أه . والتانية اه . والتالتة أه

الأولــــة: مصر؛ قالوا "تونسي" ونفوني
و التانية: تونس؛ وفيها الأهل جحدوني
و التاتلة: باريس؛ و في باريس جهلوني
=========
الأولــــة: مصر؛ قالوا "تونسي" ونفوني -- جزاة الخيـر
و التانية: تونس؛ وفيها الأهل جحدوني -- وحتى الغير
و التاتلة: باريس؛ و في باريس جهلوني -- ونا موليـيـر
=========
الأولــــة: مصر؛ قالوا "تونسي" ونفوني -- جزاة الخيـر -- واحسانـي
و التانية: تونس؛ وفيها الأهل جحدوني -- وحتى الغير -- ما صافاني
و التاتلة: باريس؛ و في باريس جهلوني -- ونا موليـيـر -- في زماني
=========
الأولــــة: شربتنـــــي من فراقـــها كــــاس -- بمــرارة
و التانية: اه فرجتنــــي عالجمــــال ينداس -- يا خسارة
و التاتلة: يا ناس ياريتني كان لي فيها ناس -- وإدارة
الأوله أه . والتانية اه . والتالتة أه
=========
الأولــــة: أشتكيها للي أجــرى النيــل
و التانية: لطَّشْتْ فيها ممتثل و ذليـــل
و التاتلة: بدمعي عليها غرَّق الباستيل
الأوله أه . والتانية اه . والتالتة أه

**************************


العامل المصري

ليه أمشي حافي. ونا منبت مراكيبكم
ليه فرشي عريان, ونا منجد مراتبـــكم
ليه بيتي خربان, ونــــا نجار دواليبـــكم
هي كده قسمتي ؟
الله يحاسبكم
----------
ساكنين علالي العتب, وناللي بانيهــــــا
فارشين مفارش قصب, ناسج حواشيهـا
قانيين سواقي دهب, ونا اللي ادور فيها
يارب مهوش حسد
لكن بعاتبكم
---------
من الصبـــــــح للمسا؟ والمطرقة فيدي
صابر على دي الأســا! حتى نهار عيدي
ابن السبيل اتكسى, واسحب هرابيدي
تتعروا من مشيتي
وأخجل أخاطبكم
---------
ليه تهدموني ونــــــاللي عزكــــــــم باني
أنا اللي فوق جسمكم قطــــني وكتـاني
عيلتي في يوم دفنتي مالقيتش اكفاني
حتى الأسية. ونا راحل وسايبكم



**************************


دوسيهات الدواوين


في دي الدوسيهات أشغالك وأشـــــــغالي
بقى لها خمسين سنة في وضعها الحالي
فيها معاش أرملة قالــــــت يابو عيـــــــالي
وعرضحــــــال شاب بائس م العمـــل خالي
و مشكلة وقف فاتها خورشــــــــــيد الوالي
حاططها صاحبـــــــــك وبيقول لك ونا مالي
دا حسني بيه المديــــــــر العام باعتها لي
و لسه عايزالها إمضة مستشــــــــار عالي
و لا حاتنزل على الأرشيـــــــــــــف طوالي
أدي النظـــــام اللي خارب بيــــــــت مالي
و مركــــــب الفقر أمثــــــالك وأمثــــــــالي



**************************



في الطريق


أربع عساكر جبــــابرة يفتحوا برليـــــــــن ......
ساحبين بتاعة حلاوة جاية من شربيـــــــــــن
شايلة على كتفها عيل عنـــــــيه وارميـــــــن
و الصاج على مخها يرقص شمال ويميـــــــــن
إيه الحكاية يا بيه؟ جال ... خالفت الجوانين ؟
اشمعنى مليون حرامي في البلد سارحين !
يمزعوا في جيوب ويفتحـــــــوا الدكاكــــــين ؟
اسأل وزير الشون والا أكلـــــــم ميـــــــــــن !



**************************