ما اقدرش أنسى البشـــــــــــــر ............ صلاح جاهين

ما اقدرش أنسى البشـــــــــــــر





موجود على الأرض دم كتير و له أصحاب

ماشيين على الأرض لسه مانتهوش لتراب

قاعدين على البرش لسه من ورا الأَبواب

لاهدين ورا القرش لسه و بيطولوه بعذاب

عايشين على الشمس و الطين هما و الأَعشاب

عاملين لترس المكينه سيور من الأَعصاب

حارقين فى فرن القمينه غلابا مظلومين أَغراب

موجود على الأرض دمع كتير و له أَسباب

فى عيون مرات الشريد اللى شبكها و غاب

و ف قلبها اللى الشباب عَجَّز فى قلبه و شاب

و ف صحنها اللى صبح بعد الحكايه خراب

و دمع بنت الطريق صادق مهوش كداب

يبكى طريقها الطويله و قلة الأَحباب

يبكى خطاها الذليله بين كلاب و دياب

يكتب على الأَرض للعالم أَمرّ حساب

و الأَرض تشهد على دموع طفل نام ع الباب

و دمعة الطفل م الرمان بتملا كتاب

كلام عن العدل بين الأَبرياء و عتاب

موجود على الأَرض موت و جروح و شوك و خَراب

جنب الزهور و اليور و المنظر الجذاب

جنب الخدود و النهود و عواطف العزّاب

موجود جنود مجرمين ناقصين قرون و أنياب

مسيتبعدين أَرضنا و منجسين لا عتاب

مقدرش أَنسى دا كله و اتوه أَنا فى شعاب

مقدرش أَنسى البشر متوزعين أَسلاب

بين الحرامى دالاس و تشرشل النصاب

و اوصف جمال الغروب و الشمس نازفة سحاب

ملزوم أَحس بألم و انزف قصايد نار

تضحك لنا من بعيد أَيام حاتبقى شباب