طريقه للزبادي مفيش اسهل من كده

أنا النهاردة جيبة طريقة سهلة للزبادى مش بعمل غيرها يا رب تعجبكو

بصو بقى انا لا بحطه فى الفرن ولا بجيب كراتين ولا لمبة وفيشة وكهربا ولا حواديت من دى خالص
انا بجيب كيلو لبن مغلى وبعد ما بيكون برد بحط علية كوب زبادى جهينة (أو أى نوع غير الزبادى البلدى ) طعمه بيبقي احلى كأنه جاهز
بيتقلب وبيتصب فى الكوبايات وبعد كدة بجيب صينية ألومونيوم من اللى بتخش الفرن
بملاها مية وفيها ملعقة صغيرة خل عشان الالومنيوم ميتغيرش لونه (قال بنحافظ ع الصينية يعنى )
وبحط الكوبايات كلها فى الصينية اللى فيها مية دى وبتكونى موطية النار عليها اوى لحد ما تحسي ان المية سخنت وقربت ع الغليان بس مش تغلى للأخر لحسن الكوبايات تتكسر
بعد كدة برفعها من ع النار وبحطها على الرخامة وأغطيها بحلة كبيرة ( بحيث أن قطر الحلة يكون أكبر من قطر الصينية ) عشان تتكبس ع الصينية
بسيبه لمدة 8 ساعات بالظبط هتلاقيه مسك ان شاء الله
شيلية ودخليه التلاجة وخلاص بجد تحفه

تسلم ايدك والطرق اللي بتقولي عليها اللي هي في غاية السهوله

تسلم استاذ محمد ربنا يخليك

عضو عدد المساهمات : 93 تاريخ التسجيل : 04/12/2010

طيب الكبيات بلستك ولا ازاز

لا زجاج استاذ مصطفي بس مش تسيبهم كتير علي النار في المايه يعني اول ما المايه تسخن بس تشيل الصنيه من علي النار عشان مايتكسرش الزجاج

يا سلام عليكى يايويو

بجد طريقة جميلة وبسيطة

بس الحمد لله مش بحب الزبادى

طريقه للزبادي مفيش اسهل من كده 11237134755

طيب اللبن لو جهينه برضه (لبن معلبات يعنى ) ينفع ؟ وهل اخففه بشويه ميه ولا لا ؟
وماينفعش اسيبه يبرد ساعه مثلا واكمل 7 فى التلاجه ؟
وشكراً .

تسلم يارب يا محمد شكرا للرد

بلبل افندي كتب:: طيب اللبن لو جهينه برضه (لبن معلبات يعنى ) ينفع ؟ وهل اخففه بشويه ميه ولا لا ؟
وماينفعش اسيبه يبرد ساعه مثلا واكمل 7 فى التلاجه ؟
وشكراً .

اي لبن سايل ينفع سواء معلبات او طازه والمايه لا مش ينفع تخففه _ انت بتحط الزبادي في اللبن وتقلبه كويس وتحطه في الكوبايات وتعمل الطريقه_ اما بالنسبه
لل7 ساعات دي بصراحه انا مجربتهاش والله اعلم_ انا بعمل نفس الطريقه اللي كتباها

» كأنك مفيش - للشاعر أحمد فؤاد نجم
» لمعرفة مين عملك بلوك "اسهل طريقة"وبدون برامج او مواقع
» التعليم بكفرالشيخ على نهج ابتكار مفيش تعليم يبقى فيه.. تكدس
» 25 طريقه لربط طفلك بالقرآن
» حسين سالم في طريقه لمصر «محبوساً»