سر الكفته

بعد عناء تم كشف سر الكفته المشويه على الفحم

المكونات دى لكيلو لحمه و يقاس عليها عند زيادة الكمية
1- اللحمه تكون مفرومه فرم خشن مش ناعم
2- يضاف 20% دهن بتلو (من عند الجزار أسمه نطر)
3- تتبل الكفته بملح و فلفل و بشر بصله متوسطه مصفاه تماما من المياه لإننا هانحتاج الميه عند الشوى يعنى احتفظى بيها
4- معلقتين برغل ينقعوا فى ماء لمده ساعه ثم يصفوا من الماء تمام و يتم فرمهم مع اللحم و البصل
5- يقسم الكيلو على حسب عدد الأسياخ و يوضع على شكل كرات فى الثلاجه لمده 3 ساعات
6- فى طبق او صينيه ضعى مياه البصل و عليها معلقه بيكربونات صوديوم (بيكينج باودر)
طبعا فى ماده تانيه بتستخدم لكن صعب تلاقيها عند أى عطار عموما هاقول عليها اللى يقدر يجيبها يحطها بدل البيكربونات اسمها (عطرون) و هى على شكل الملح الخشن و يتم تذويبها فى ماء و تصفيتها من الشوائب و طبعا يفضل إذابتها فى ماء البصل
7- طلعى الكفته من التلاجه قبل الشوى على طول و تمسكى قطعه الكفته على ايدك و تحطى السيخ عليها من المنتصف و تضغطى اللحمه عليها و تبدى تفرديها على السيخ بالضغط المتواصل لفوق و تحت لحد ماتتفرد على السيخ بالسمك المناسب ماتبقاش تخينه قوى و لا رفيعه و الأهم بعد ماتفرديها بللى ايدك بميه البصل اللى عليها كربونات او عطرون و اضغطى على مسافات متباعده بصوابعك علشان تعملى فروق فى السيخ ماتبقاش الكتله كلها حته واحده ده بيقلل من وزن الكفته على الشيخ و ماتقعش
(فايده البيكربونات أو العطرون انه بيخلى اللحمه تتماسك بسرعه اول ماتشم النار و بكده تقدرى تشمعى السيخ بسرعه و تقلبى الجنبين و بعدها تسويه براحتك بقى بعد ماتماسك)
بعد ماتشيلى السيخ اللى استوى فى صينيه مفروشه بالعيش و عليه بقدونس متقطع حطى الكفته و غطيها و حطيها فى فرن البوتجاز و اقفلى عليه و هكذا لحد ماتخلصى المقدار كله

أحلى كفته ممكن تاكليها فى البيت و أرخص طبعا من اى محل و أنضف و نسخه طبق الأصل بل أفضل فى الطعم و طبعا ده على حسب نوع اللحم

طبعا فى حاجه تانيه بتتحط على الكفته اللى بتخلى الناس ماتقبلش طعم اى كفته غير من المحلات
الماده دى هى محسن طعم أسمها مونوصوديوم أو ملح صينى تشبه السكر فى شكلها و موجوده فى الهايبرات الكبيره زى كارفور مثلا الكيلو ب 20 جنيه و طبعا ده يفضل عندك سنه و اكتر لأنك بتحطى معلقتين بس على الكيلو منه

يايويو انا مش فاهم المواد الا بتقوليها دى بتستعمل لتصنيع الكفتة
ولا تصنيع قنبلة ذرية ياابلة كلنا عارفين كفتةالشوى فيها بصل وخضرة وتوم وبهارات ويتم فرم اللحمة وفرم البصل والثوم وتقطيع الخضرة ونضيف البهارات والملح
ونولع الفحم ونسيخ اللحمة ونحطها على الفحم
وبالهناوالشفا تصدقى جوعت

ههههههههههههههه ولا انا فاهمه ههههههه_لما تفهمهم قولي ايه هما وعلي فكره هي حاجه فعلا تجوع

سوف اجربها عن امانتك
ونشوف يا ست الستات
هههههههههههه

استاذ كمال انا مش مسئوله عن اي اضرار او اي تلبك معوي لا قدر الله هههه وعلي كل حال رقم الاسعاف 123 للطوارئء يعني_ اللهم بلغت اللهم فاشهد ههههههه

عضو عدد المساهمات : 38 تاريخ التسجيل : 06/12/2010

ويبارك فيك يارب _ جزاك الله خيرا استاذ هشام