دستور يا بتوع الدستور
سلامات يا بتوع الصناديق
بسمعكم من ست شهور
وكلامكم مايبلش ريق
أنا ثورت عشان كنت بعانى
من فقر وأحوال مقلوبة
أنا شامم غاز لما عمانى
لكن مش لاقى الأنبوبة
ومحدش طلع وادانى
مليم م الثروة المنهوبة
والطوبة مجتش فى معطوبة
وأتارينا بنحلب فى الطور
دستور يا بتوع الدستور
أدونى عدالة اجتماعية
وعلاج وعلام بالمجان
وعلاوة 12 فى المية
علشان الجيب العيان
بتقولوا الشعب يريد لكن
الشعب فى حاله وغلبان
وكرامته بتنقح أكمنه
مش لاقى فلوس وصل النور
دستور يابتوع الدستور
الشعب يريد أبسط حاجة
حرية وعدل ومساواة
الشعب ماهوش ناس محتاجة
نزلت وبتشحت لله
الشعب ده ناس كسرت طوقها
نزلت بتطالب بحقوقها
ولا نخبة ولا دقون هتسوقها
ما تخلو الطابق مستور
دستور يا بتوع الدستور
الأربعاء 7 سبتمبر - 23:59:54
