بعض أعمال صلاح جاهين

فى ايطاليــــــــــــــــــا





فى ايطاليا ( فينوس ) بتبيع ( بونبون ) .

فى ايطاليا ( أبو للو ) واقف جون .

فى ايطاليا ملايكه .. و فيها العكس .



فى ايطاليا مستودع تماثيل ..

مرمر ، و برونز ، و بشريه ..

كونتات ، بارونات من أصل نبيل ،

ماشيين ، بمرمح أثرية ...



أعاجيب فى إيطاليا كتير تِلحس

بس الأَعجب ايه تتصور ؟

فى إيطاليا كمان ( ملكة اليزابث ) ...

بس الملكة اليزابيث تايلر



0000000000000000000000


فى دمشـــــــــــــق





الست مرات البيه

دوّبت الجزمه عليه .

قال إيه ..

ما بقاش بيجيب طلباتها جمعيا ليه ؟

اشمعنى ايفون ،

اللى ف لبنان

جوزها انطون

إداها (ترواه مليون )

علشان

سيارة ، و شبشب ، و جونلة ، و يخت ، و يوتيان .

و الست مرات البيه التانى كمان ،

لسه مناقشتهم ، بالليل ، فى البلكون .

سايبه العلامات الزرقا تحت عنيه

و اتلم البيه ع البيه ،

و همس بالخطه اليه ،

عملوا المشروع ، و نهوا الموضوع ، بأمان ...

و تمرد قال فى دمشق ، و زيطة ، و شغل جنان .

و زمان .....

قالها خواجه نابليون

يا خبيبي ضرورى ضرورى تفتش ع النسوان !

قصــــــــــــــة




كان فيه ولد صغيّر ... عنده انتاشر سنه .

عيّل مفعوص و قصيّر ... و غاوى فَتونه ،

بيمثل دور فى ذهنه ... لشخص عظيم الشأن ،

و يوماتى يحلق دقنه ... مع إنه مالهش دقن .

بالموس و خلاص و يحرت... ( المجنون البعيد )

لحد ما دقنه كبرت ... قال لك ده اليوم ده عيد

و وقف قدام مرايته ... يتنط م الفرح

اكمنَّه ( حسب روايه ) ... زى باباه انجرح ...

تَعَ شوفه بقى النهارده ... راجل بيه د الحيط

و صداغه كل فرده ... فيها من القطن غيط ،

يحلف ع النار و الميه ... مهو حالق جمعتين ..

و دى قصة فلسفية ... مغزاها ف كلمتين :

شرم برم ، يا حلوللى ... هأو أو إشّ إشّ ،

ترالاللى ، أمان يالالاللى ... حرنكش ، طظ فش .


000000000000000000000000


كــــــــــــــوكتيل





حفلة كوكتيل دبلوماسية

فى نظمة دولية

أصوات دردشة هادية و نشطة

تشبه فقاقيع شبانيا فرنسية

ريحة السيجار العطرية

بعض الازياء الوطنية

بعض صوى المزة

بعض الكئوسات رايحة و جاية

السوفيتى بيشرب طبعا فودكا

الصينى بيتصور جنب الويسكى

و الأمريكى بياكل كافيار حاف

وصل الضيف الاسرائيلى

ذو الضحكة العسلية

سلم على كل البشرية

و استلم الكاس بحماس فنان

و طلب م الكابتن تلج كمان

و شرب و شرب

كأس الانسان فى كل مكان

كأس الرجالة و النسوان

كأس العواجيز و الشبان

كأس اليابان

لبنان

و كمان لبنان

و طلع بالجزمة ع الترابيزة الجانبية

و مشى بالجزمة ع الأكلات الشعبية

و رقع ضحكة و عمل العملة اللى مش هيه

خلى المطرح تواليت

اتكهرب جو الحفلة الرسمية

و اتقال لا لا ........ لا لا .... لا لا ...

دى غلطة فى الاتيكيت

مـــــــــــــــــــــدد





بيرم يا تونسى ، بديع أيا خيرى ،

مدد مدد ، يا شيوخنا يا أقطاب ..

احضرنا يا حسين يا شفيق مصرى ،

و النجدة يا عبد السلام يا شهاب ..

يا سعيد يا عبده ، يا مصطفى يا حمام ،

محمود يا رمزى نظيم ، تعال الينا ..

و مدد يا عزت صقر ، يا خليل تظير ،

مدد يا شيخ يونس يا قاضى مدد ...

هاتوا الزجل ، شماريخ ، و صواريخ تطير ،

لسه الحاجات اياها .. ماليه البلد !





معنى الكــــــــــــــــــــــلام





معنى الكلام و السلام فيه دوشه ع المسكن .

معنى الكلام .. صلوا ع اللى القلب له مسكن

معنى الكلام .. امسكوا فى أصل السبب مسكا

أصل السبب دوله ناميه و راميه فوق خالص ،

و الهمّه فى القمه واخدة حدها خالص ..

خدوا منى كلمة ، و حكمه من دهب خالص :

( مين فيها حالص ، و مين مش فيها يتمسكن )



معنى الكلام بالتمام يا حكم يا محلى ،

نغنغ ، و لعلع ، بتنظيم ريفى و محلى ،

الكل تنه ف محله ، و تنى فى محلى ،

نتغذى ونحّلى ، و نزور بعض فى المسكن !


000000000000000000000000


موال لرواد الفضــــــــــــــــــــاء





سألت عن بختى ، قالوا الجم له أحكام ،

نجمك فى يوم يرفعك ، و يضعضك أيام ،

إن مال يمين تتنصف ، و إن مال شمال تنضام ،

و إن تروق دنيتك ، و باداهيتك لو غام .

نزل الطاعون ع البلد، قالوا النجوم تتلام ،

و الحرب قامت ، قالوا لنا : نجم و ابن حرام ،

واقف فى وسط السما ، شاهر علينا حسام ،

نجوم و ياما قصص .. و نجوم ، و ياما كلام ..

و فجأه فجأه كده ، فجأه مفاجأة تمام ...

انقض م الأرض ع الملكوت ولد ضؤغام ،

رائد فضاء .. و اللى بعده .. و بعده .. صبحوا زحام .

احنا البشر فين ، جوم السعد تيجى قوام .

ياللى انتو فوق ، اسبحوها عندنا بنظام ،

و زقوا نجم الحروب ارموه فى برج سلام .

و أما نجمى أنا ...

قولو له يضحك لى ..

و نفضوه لو سمحتم .. إن لقيتو غيام .

ناصية الشـــــــــــــارع





بالأَسبرين ... و السكاكين

و بالمسدس مقتولين

على آعمدة كل الجرايد مصلوبين

شبّان صغار

أزهار فى فجر العمر ما شافتش النهار

متكلبشين فى الزنانزين أو مغروزين

فى الطين فى قصر النيل وعايزين عطاسين



ع المشرحة إنسان نحيف

بشنب خفيف أصفر ليف

خدوده من قيمة يومين مش محلوقين

صوابعه من شرب السجاير محروقين

عينيه على جدار الفراغ متسمرين

و عل الجبين رفرف سلام الميتين

ما تسألوش كان اسمه إيه

إسمه على المحضر بقى المجنى عليه

إسمه بقى الجثة فقى أَوراق الدوسيه

ما تسألوش عن قصته كان موته ليه

المسألة صبحت فى إيد المسئولين



على ذمة التحقيق سجين

إنسان حزين

فى قلبه إحساس الغريق

ما لهش عون

فى دماغه أَتر من حريق

لابس قميص مربعات و بنطلون

و ف رجله صندل من زمان ما لهش لون

يبص على آخر الطريق

يلاقيه ما بين رجليه تمام

ثابت عليه الاتهام

و حياته بين الناس حرام

حرام عليه يركب ترام

حرام عليه الأتوبيس

حرام عليه الأرصفة و الفوانيس

و المدرسة و السينمات

مكتوب عليه يعيش ما بين الحابيس

فى الومانات

ما تسألوش ده يبقى مين

شفتوه و بتشوفوه كتير فى الجرانين

بلاش سؤال

على كل حال

المسأًلة صبحت فى إيد المسئولين



على ناصية الشارع أًمين

واقف مع حسين و اسماعين

و بنيامين

متسرحين و مشمرين

و شوية ويوصل مصطفى و عبد السلام

و يبتدى يحمَى الكلام

و يغمزوا بعينهم و يمكن يشتموا

و يقولوا لفظ بذئ و هما بيضحكوا

ما تفرحوش لما تشوفوهم من بعيد

نازلين هزار و قزقزه

و ما تقولوش ياريت زمان التلمذه

يعود علينا من جديد

بيشتموا

و ف كل قلب صراخ يحاول يكتمه

بيضحكوا

و ف كل صدر عويل و نار راح تهلكه

و تفرتكه

ما تفرحوش

و فكروا إزارى نحوش

اللى حايشرب له قزازة أسبرين

و اللى حايطعن أًمه أَربع سكاكين

من قبل ما الميت يموت

من قبل ما الأَيام تفوت

و المسأَلة تصبح فى إيد المسئولين .

000000000000000000000

نهاية الأسطــــــــــــــــــورة





دى نهاية الكبر و المباهاه

و الدب لما يصدقه اللى رماه

لحد ما الصدمة تجى مداهماه

و محولة الخمرة إى مقاياه

و ممرغاه يندب على قتلاه

بنى إسرائيل العقل منهم تاه

فى متاهة الأساطير يا ولداه

و الحقد ضيع رشدهم و طفاه

خلطوا ما بين البطش و المعاناه

و احتاروا : هم لابا و الا عتاه

شعب اتلعن م الرب و الا حاباه

و الرب رب الكون و الا أداه

مخصوص لهم ؟ سبحانه فى علياه !

الرد جالهم يعدل الموازين

على أيد جنود من مصر ، بنى آدمين

لا مختارين م المولى و لا ملاعين .....

بس الوطن لابد يحموا حماه !





يا سلام يا دكتــــــــــــــــــــور





أَظن ، يا ملهمانى الفن و الأَشعار .

و قلبى : بلاّصك ، اللى بتطلعى به الفجر ...

من بعد اذنك ، بلاش النوبه م الترعة ،

امليه لى من عند ابو البالطو النضيف لا بيض ،

و قولى له ، يا زينة الجدعان ، صباح الخير ...



حلال عليك المدارس ، و الأَدب ، و العلم ،

حلال عليك غلب أَهلك فيك ، عشان تكبر ،

و تبقى عالم ، حكيم ، تشفى البلد م الداء ...

وتقول : يا (بلهارسة ، يا هارسة القلوب ، روحى ،

و تعالوا يا فلاحين ، خدوا بعض بالأَحضان )



الفلاحين صفر ، لكن صلبهم جامد ،

شالوا الجبال ، قلقوها ، و هم لسه صفر ،

اشحال بقى ، لما يجرى الدم فى خدودهم ،

بدال ما يجرى مع الروح نفسها فى البول .

و قولى له : يا زينة الجدعان ، براوه عليك



ندرن علينا ، نهار ما بالسلامه نقوم ،

لنعلموه عيد ، و ترقص فيه أَمواتنا ...!

أَجدادنا من عهد فرعون ! ... كلهم نادرين ،

م الموت يقوموا ، و يبحوا ، ينقّطعوا الزفة !

يا سلام يا دكتور ... ده يوم زى ( الجلاء ) ذاته .

وكيــــــــــــــل





و يهيه ، فى المحاكم ... شدت واحد وكيل ...

عند البوفيه كان واقف ... بيشرب جنزبيل .

و الجنزبيل ده أَصله ... للصوت مالوش مثيل .

مكتوب عليه فمجلد ... (مرافعات هابيل )

يشرب منه المحامى ... يمسح جدع زميل

و يفحم النيابه ، ... و ويقصف النخيل ..

و بهية ماشية جنبه ... فى كوريدور طويل ،

تشرح له ، و هى تبكى ، ... و تبلل مناديل ،

و تقول له : كتير عليا ، ... يقول لها : قليل ،

اتنين ريال يا وليه ، ... مبلغ تافه ضئيل ،

خدى بالك م الفصاحه ، ... و من العلم الاصيل ،

و الإش لما يحصل ، ...مفعول الجنزبيل ..

عنها ، و دخل ع القاضى، ... دخلة أَبو زيد تقيل ،

خبط الترابيزة و قال له ، ... أنا طالب التأجيل



0000000000000000000000000


و قال يا بلـــــــــــــــد





نعم ... بورسعيد الفكرة و البرهان ،

فى لمعة عيونه من ميدان لميدان ،

فى برق انفجار الصخر ، فى مصنع اتفتح ،

فى طلقة صاروخ ، أو فى ارتفاع بنيان ...

حى العرب صامد ! ..

علم العرب صاعد ،

بإدين عرب خلان

و جمال ..

و جمال بيتكلم ،

و يصحّى ، و يعلم ،

و يسلّم الفتيان ،

وطن ، مالوش غالب ،

ما يميلش على جانب ،

و يبادى بالاحسان ...

و طن بلا صحرا ،

وطن بلا فقرا ،

و حياة بلا أحزان ...



و قال : يا بلد ، خلينى واحد من العدد .

قالت له البلد : ما فى سواك ربان .

و قال : يا بلد : عاهدينى ع الصبر و الجلد .

قالت له البلد : كفّك يا بو الشجعان !