اية الى مش عجبك فيها قول رأيك بصراحة

كل واحد فينا يقول رأية بكل صراحة اية الى مش عاجبة فى سيدى سالم ونفسة يتغير ياريت كلنا نشارك فى الموضوع يمكن نقدر نغير حاجة.

أتمنى الجميع يشارك وهذه دعوة من أجل خير بلدنا بدون تعصب ...
وشكرا لأخى المجهول لطرح هذا الموضوع ...

اللى مش عاجبنى فى سيدى سالم
1- عدم النظافة فى الشوارع (الاهمال)
2-البنية التحتية = صفر
3-الناس اللى بتفرش فى الشوارع اتمنى يكون لها مكان خاص للبيع
4-موقف سيدى سالم يدار بعشوائية
5-عدم وجود حديقة للشباب او حتى العائلات يجلسون فيها
6- رمى اى مخلفات موجودة فى المصرف
7-كل شخص عندة محل يتمتلك نصف الشارع كانة ملكة
واللة فى كتير بس اللى انا اقدر اقول علية ان سيدى سالم مهملة من قيل المجلس واهلها كتير جدا

السلام عليكم ورحمة الله وبركاته
استاذ ( مجهول ) الموضوع اللى حضرتك طرحتة موضوع مهم جداً ويجب ان ان جميع اعضاء المنتدى وخاصة اللذين ينتموا لمركز ومدينة سيدى سالم
اولاً عندى تعليق بسيط على راى استاذ ميمى
** بالنسبة للسوق حالياً جارى اجراءات العمل فى تنفيذ سوق شامل تكاملى لجمع جميع الباعة وبالتالى يتم اخلاء الشوارع ومقرة سوف يكون مكان المصرف الملغى عند شركة المياه وان شاء الله ممكن انشر صورة من الرسم الكروكى للسوق بعد ايام قليلة
** بالنسبة للموقف المدينة تقوم باستكمال ردم المصرف من نهاية التغطية حتى نهاية مقابر نايف عماد وبعد الانتهاء من التغطية هناك مقترح بعمل موقف مجمع لمدينة سيدى سالم فى هذه المنطقة
** بالنسبة للحديقة هناك حديقة العائلات ويقام فيها الافراح والمناسبات وتم انشاء حديقة اخرى تسمى حديقة الزهور وهى متاحة للجميع
** مشكله رمى القمامة هناك مصنع لتدوير القمامة على مصرف نمرة 8 بفدان الفقى وشغال منذ اكثر من 6 شهور
ثالثاً بالنسبة للاشاء الموجودة فى سيدى سالم وتحتاج التعديل
1- اولا الحفر فى الشوارع واعادة الرصف ثم الحفر ومحدش عارف اسباب الحفر والردم والرصف اكثر من مرة وحدوث العديد من المشاكل بسبب ذلك
2- شبكات مياه الشرب واخطلاتها بمياه الصرف الصحى وقد ادى ذلك الى اعلى نسبة فيرس c بمركز سيدى سالم
3- مشكله قانون البناء الموحد 119 لسنة 2008م وما فرضة من رسوم فى تراخيص القرى وقرار المحافظ بفرض رسوم على توصيل المرافق بالمدينة لتحسين المرافق بها مع العلم ان مركز سيدى سالم هو المركز الوحديد الذى يقوم بتطبق هذا القرار
والعديد من المشاكل اللى محتاجة حل

يا اخ ميمى انت مش عجباك البلد خليك فى السعودية خلاص ومتتكلمش كتير انت من 3 سنيين فى السعودية تعرف اية انت عن البلد انت عمال تتكلم وخلاص روح اتشطر على كفيلك
سيدى سالم اجمد واحسن شعب بقولك ما تنزل الانتخاباتوانا معاك

يا ميمى انت عارف الى انا بحترمك معاك عندنا شوية سلبيات ماشى بس مش كدة انت خليت البلد وحشة اوى يا راجل اية المشاكل دى كلها السوق اتشال من شارع مصطفى كامل وتم القبض على تجار المخدرات من نفس الشارع

بص على تعليق بسمة فى حاجات بتتغير فى البلد يا راجل

الى الاخت بسمة ممكن اعرف حضرتك بتشتغلى اية بس اوعى تقولى مهندسة

الاخ فكك منى
اولا انا عمرى ماسفرت السعودية غير مرتين وعمرهم ما كانوا عمل كانوا لفرض الله
ثانيا واضح انك تعرفنى ما تكتب اسمى بالكامل

الى ميمى باشا

انت شكلك زعلت انا اسف يا ميمى باشا
انت افشت عليا كدة لية احنا فى حوار مفروض ما فيش زعل
بص للبلد من الزاوية الحلوة ماشى ياعم ميمى

الى الاخ فكك منى
انا بجد ما زعلت منك
ممكن اعرف الزاوية الحلوة دى فين ؟
اى شى فى الكون له عيوب ولة مميزات لما العيوب تفوق المميزات تكون المعادلة غلط

الى الاستاذه بسمة
لية ديما اللاقى كلمة (جارى تنفيذ) مشروع السوق دةمن فترة وتفتكرى لما السوق يشتغل مش هيكون فية ناس بتبيع فى الشوارع
وكلمه هناك مقترح انهم يعملوا موقف سيارات بعد كام سنه ؟
وبالنسبة للحديقة اللى مقصود فى كلامى فيها حديقة جلوس للعوائل مش حديقة افراح ومناسبات وحديقة العوائل اللى انتى بتكلمى عليها لو ما فيها فرح تكون خاوية على عروشها
ممكن اعرف حديقة الزهور دى فين
مصنع القمامة بلا فايدة طول مافية قمامة فى الشوارع
مقر قمامة حى مسجد كحيلو ومقرها خرابة شارع قناه السويس
مقر قمامه حى النادى الرياضى ومقرها شط المصرف بجوار بيت على صلاح
مقر قمامة سكان السوق القديم ودى طبعا كتير واهمها جدار مصلحة التلفونات
والاهم قمامة شارع 23 بين الرصيف
واللة يا اخت بسمة انا بزعل لما اشوف البد كدة لما الدنيا تمطر 5 دقائق اكيد انتى عارفة البلد بتكون ازاى

وعلى فكرة عنوان الموضوع اللى بنتكلم فية اسمة اية اللى مش عاجبك فيها

يا عم ميمى ارحمنا شوية انت شيوعى ولا اية شكلك صحفى فى جريدة لا

تريس ولا تتسرع يا اخ ميمى باللة عليك اخر مرة كنت فى سيدى سالم امتة

السلام عليكم
** استاذ ميمى اولاً بالنسبة لكلام حضرتك عن السوق افتكر ان مبقاش فيه اى بائعين فى الشوارع وكلهم فى منطقة واحدة جانب السنترال ومنطقة ابو فرين اما مقترح السوق دة علشان يبق فيه سوق تكاملى وفعلا المقايسات اتعملت والرسومات الهندسية يعنى هناك خطوة ايجابية ودة فى حد ذاته شىء كويس
2 - بالنسبة للحديقة اولا الحديقة دى للعائلات والشباب وجميع الفئات وتسمى حديقة الزهور ومكان الحديقة بالتفصيل بتأخد من شارع السادات من بداية السنترال حتى اول مكان المطافى يعنى تتوسط شارعى السادات وشارع صلاح الدين ويوجد بها العديد من الكافتريات والاشجار ويوجد بها جميع المستلزمات
3- بالنسبة للقمامة مصنع تدوير القمامة شغال بالفعل

السلام عليكم ورحمة الله وبركاته
** اظن الحوار يا استاذ ميمى واستاذ فكك منى اخد شكل تانى خالص ودة موش الموضوع الرئيسى افتكر دى بلدنا وعايشين فيها وحتى لو احنا خارج البلاد بردة بننتمى اليها وكل واحد يدور فى شهادة ميلادة او بطاقته وهو يتذكر هو بينتمى لاى مدينة حتى لو مقيم بالسعودية او امريكا منذ مائات السنين

السلام عليكم ورحمة الله وبركاته
** مشاركه حضرتك يا استاذ فكك منى اتحذفت لان دة موش موضوعنا لو حضرتك عاوز تكتب عن الكورة والاهلى والزمالك اكيد ممكن تفتح موضوع جديد وانا اول من يقول رأيه

السلام عليكم

على فكرة انا طرحت موضوع اية الى مش عاجبك فيها ممكن نغيرة بطريقة الحوار نحاول نغير من نفسنا قبل ما نغير المجتمع لان بالطريقة دى مش هانقدر نغير اى حاجة ارجو الموضوعية فى الحوار ويكون فى صلب الموضوع .

السلام عليكم ورحمة الله

** صحيح اسم الموضوع ايه اللى موش عجبك فيها لكن ليس معنى ذلك اننا نخلى صورة البلد وحشة اوى كدة لازم اللى يقول حاجة يقول حاجة موجودة فعلاً وواثق منها وانا عن نفسى مفيش اى حاجه قولتها غير لو كانت واقعية وموجودة وصحيحة وبالنسبة للحديقة اللى محدش عارف موقعها انا حددته بالظبط وكمان فيه صور منشورة عنها قبل الانشاء وان شاء الله فيه صور هتنزل للحديقة وهى بمنظرها الطبيعى قريب ان شاء الله

فين الردود يا جماعة اظن ان الموضوع فية نقاشات اكتر من كدا احنا لسة معملناش حاجة

السلام عليكم
اشكرالاخ الذى اتاح لنا فرصة معرفة سلبيات بلدنا وايجابياتها
قراءت جميع الردود فى هذا الموضوع والحقيقة ان ردود الاعضاء مثمرة جدا ولكن لى ملحوظة احب ان اوجها للاخت بسمة تتحدثين عن حديقة الزهور اتعلمين موقع الحديقة للاسف ان القائمين على انشاء هذة الحديقة جانبهم الصواب فى الاختيار موقع الحديقة ياسادة يقع بجوار بيوت ( الغجر) وساحكى لكم قصة طريفة حدثت معى شخصيا زهبت انا وزوجتى الى الحديقة والحقيقة اننى وجدت حديقة جميلة والخدمة فايف ستارز وبعد 10 دقائق بالظبط سمعنا وابل من الشتائم من جيران الحديقة ولا اريد ان افسر معانى الشتائم لان الموقع محترم ولكن اعتقد انكم فهمتم مااريدة
وبعد ذلك وجدت الصبية يتسلقون سور الحديقة ووجدت خناقة كبيرة لم تنتهى الا بعد انتقال الشرطة الى الحديقة
بالله عليكم هل استطيع ان اخذ زوجتى او اختى الى مكان مثل ذلك تانى
اما البائعين الجائلين فى الشوارع فااعتقد انهم مازالو موجودين الى الان والدليل وجودهم امام موقف كفر الشيخ حتى منتصف الليل
واهم شئ يزعجنى فعلا المواصلات التى اصبحت اصعب من رغيف العيش من منا يريد ان يذهب الى كفر الشيخ لابد ان يمشى الى كوبرى عباس وهو ونصيبة يلاقى مكان او لا
اكتفى بهذا حتى لا يتهمنى الاعضاء بانى اجعل البلد بصورة سيئة ولكنى احب البلد واتمنى ان اجدها اجمل بلد

السلام عليكم ورحمة الله وبركاته

** اشكر كل من ساهم فى الرد على هذا الموضوع ولدى تعليق على رد الاستاذ محمد اولا بالنسبة لحديقة الزهور مكانها مناسب جداً وخاصة ان المنطقة اللى حضرتك بتسميها شارع الغجر فى الفترة المقبله سوف تشهد تطور هائل وبالتالى اختيار المكان كان مناسب لان المنطقة سوف يتم تعميرها بمجموعة من الخدمات ابتداء من السوق ومجمع المواقف وحديقة الزهور اما بالنسبة لشارع الغجر دة اساس الناس اللى موجودين اكيد لما يكون فيه مشروع خدمات للبلد بيبدأ بالبحث عن الاماكن والمساحات الفضاء وليس اساس الناس المفروض انهم يغيروا من نفسهم

احنا عايزين اراء حرة من غير تجريح فى حد احنا هدفنا الصالح العام

السلام عليكم ورحمة الله

انا لم اقصد التجريح او الاهانة لانى ضد هذا المبدأ ( اساسة الناس اللى موجودين فيه ) اقصد اننا بنختار المكان من اجل اقامة الخدمة وليس البحث عن اصل الناس الموجودين او علاقتهم بالاخرين واسفة لو كان اى شخص فهم المعنى بالناحية السيئة

الاخ محمد الشاذلى دة مش حى الغجر دة حى الباطنية فية بلطجة ومخدرات وكل حاجة يا راجل دى حاجة ملهاش حل والله حديقة اية انا سمعت ان الحديقة بالليل بتبقى وكر اللى باقى يزراعو فيها با نجو ما فروض يكتبو عليها حديقة الضرب مش الزهور

ثم ناس اية اللى هتتغير الناس دى من 100 سنة فى البلد وعلى نفس الحال بلطجة وحكومة دخلة طلعة وسرقة حاجة ما تتوصفش

ياانسة بسمة
حضرتك بتقولى ان مكان الحديقة انسب مكان طيب اية دليلك على كدة المستقبل المشرق الا بتحلمى بية انتقال السوق والمواقف طيب اية فايدة كل دة والبيئة نفسها المحاطة بالمكان فاسدة
انا حكتلكم على موضوع شخصى تعرضت لية وللاسف انك كالعادة حاولتى تجملى الحقيقة
يابسمة ( من شاب على شئ شاب علية)
( والطبع يغلب التطبع )
وانا مازلت على موقفى ان المكان سئ للغاية
وممكن الاعضاء يشاركونا الرائ
والنهاية لحكم الاعضاء ليس حكمى او حكمك

السلام عليكم

انا من رأى ان فعلا المنطقة غير صالحة لكن دورنا ان احنا نوعى الناس الى فيها على الصح انا عارف الغجر كويس وعارف انهم صعب ينصلح حالهم لكن نحاول بس ازاى دا الى ممكن نناقشة

توعى مين يا سيدى 100سنة كدة صعب

السلام عليكم ورحمة الله
** استاذ محمد الشاذلى انا موش بجمل الحقيقة بالعكس انا بتمنى ان صورة بلدنا تكون جميلة فى عيون الناس وكون اننا نغير الناس دة امر صعب جدا او بمعنى ادق مستحيل للغاية يبقى لازم يكون فيه حل وسط اولا موش معقول هنهد الحديقة ونبنيها من جديد هيبقى حجم الخساير اكبر ومستحيل تغير الناس اللى حواليها لكن لازم يكون هناك دور للشرطة يعنى مثلا الحراسات الموجودة فى الشوارع لية ميكونش فيه مرور على الحدائق والاماكن المماثله افتكر انها مهمة مثل البنوك والمصالح الحكومية اللى بنخاف عليها من السرقة

بسمة انتى بتنادى بالمدينة الفاضلة شرطة اية ومرور على مين انت عارفة ان تجار المخدرات عملين رواتب شهرية للشرطة (الشرطة فى خدمة الكيف)
اظن فهمتى

يااستاذ/ محمد عبد الرازق
حضرتك راجل محترم وبتحب بلدك واحنا مش اقل حبا منك لبلدنا سيدى سالم
بس لية منحاولش تكون بلدنا احسن واحسن انا قولت راى فى موقع الحديقة وشرحت
تجربتى الوحيدة لما رحت هناك وممكن تراجع ردى السابق على الموضوع
والغجر او العرب زى مابتقول بشر مثل كل البشر الا خلقهم ربنا
ولا فرق بين عربى على اعجمى الا بالتقوى والعمل الصالح
لكن البيئة نفسها لاتصلح لاقامةالحديقة انت نفسك ممكن تاخداسرتك وتسمع كل الكلام الجارح
الا انا سمعتة واشوف رد فعلك اية
هتقفل عليك بابك ولا هتروح الاماكن الا زكرتها
اكرر مرة ثانية ان البشر جميعا لافرق بينهم

حضرتك ممكن تنزل للشارع وتصور وصدقنى هتلاقى حاجات حلوة كتيييييييييير لكن للاسف احنا بنسيب الاصل ونمسك الفرع

حاجات كتير اولها الطرق وشك والاسفلت

السلام عليكم ورحمة الله وبركاتة
توعى مين يا سيدى 100سنة كدة صعب ) يبقى هو دة الاحباط والتكاسل وللاسفل طول ما حنا بنتكلم بالطريقة دى وكل واحد بيقول نفسة يبقى على الدنيا السلام فين شيوخ الازهر فين شعوب المسلمين فين الحكام ولا خلاص كل دة مبقاش له اى لازمة ؟؟؟؟؟؟؟

السلام عليكم ورحمة الله

بالعكس سيدى سالم بلد جميلة جداً وموش لازم نشوف الجزء السىء فقط عندك حاجات جميلة كتير فى البلد ممكن تشوفها وكفاية طيبة اهلها والفطره اللى بيتعملوا بها وبعدين استاذ محمود تعبير ( وشك والاسفلت ) اظن انك ممكن تقول تعبير تانى افضل بكتير من كدة وبعدين انت رياضى يعنى موش متعصب صدقنى لو دورت فى بلدك هتلاقى اجمل مافيها ناسها موش وشك والاسفلت !!!!!!!!!!!!!!!!!

شكرا للاخ اللى طرح الموضوع وشكرا للاعضاء اللى ساهموا ونتمنى من الله اننا نشوف سيدى سالم من اجمل مراكز الجمهوريه زى ما اهلها احسن ناس

الى مش عجبنى فيها عدم وجود كنتاكى ومكاك وبتزاهت ومؤمن بجد حاجة موت

اكتر حاجة مش عجبانى فى سيدى سالم كثرة الزحمة فى الشارع الرئيسى وانتشار التوك توك بطريقة رهيبة ومستفزة جدا والطرق لاتليق بمركز سيدى سالم

اكيد هى احلا البلاد فيها اهلى واصحابى .
لكن لما لا ممكن تكون اجمل .
الموضوع اصبح نقاش فى اشياء كتير ممكن كل واحد يقول هو شايف اية وخلاص وفى النهاية الموضوع هيكتمل بكل الأراءلكل منا وجة نظر
انا عندى شىء مهم
لآنى ساكن بقرية
موضوع القمامة بالقرى ليس لها حل عندكم كل منا يتلفت حوالية وبعدين يرمى الكيس على طوا ايدة طيب نعمل اية مفيش مكان لتجميع القمامة ومن ثم التخلص منها ياريت الاقى عندكم حل

طيب يا جماعة متعملوا جمعيه خدميه لسيدي سالم وتحولوا من خلالها توصلوا للي انتوا عايزينوا والاخ بتاع كنتاكي ممكن ياخد توكيل